Орусиянын Москва, Санкт-Петербург, Калуга, Кемерово, Воронеж жана Томск шаарларынын бийликтери 7-октябрда Алексей Навальныйды колдоо акцияларын өткөрүүгө тыюу салды.
Москва мэриясы митинг өткөрүү боюнча беш арызды четке какты. ТАСС агенттигинин маалыматына караганда, шаар бийлиги «объективдүү себептерден» улам иш-чарага уруксат берилбей турганын билдирген.
Навальныйдын тарапташтарынын акциясына Екатеринбург бийлиги гана макул болгон.
Ушул тапта Алексей Навальный менен анын шайлоо штабынын башчысы Леонид Волков камакта. 2-октябрда сот аларды «уруксат берилбеген иш-чараларга катышууга чакырык жасаган» деген жүйө менен 20 суткага камакка алган.
